LU at Kanluran Kabubuhayan, Sanib-Puwersa sa Extension Program

Pormal nang nilagdaan ang Memorandum of Agreement (MOA) sa pagitan ng Laguna University at Barangay Kanluran Kabubuhayan bilang hudyat ng opisyal na pagsisimula ng Community Extension Services Program sa barangay.

Isinagawa ang makasaysayang pagpirma noong May 22, 2025, na dinaluhan ng mga kinatawan mula sa pamunuan ng Laguna University at opisyal ng barangay. Layunin ng kasunduan na maghatid ng mga programang pang-edukasyon, pagsasanay, at iba pang mga inisyatibong pangkaunlaran para sa kapakanan ng mga mamamayan sa komunidad.

Sa ilalim ng programang ito, inaasahang magkakaroon ng mga aktibidad tulad ng livelihood training, skills development seminars, health and wellness campaigns, at youth and community empowerment sessions na pangungunahan ng mga estudyante at guro mula sa unibersidad.

Ayon sa mga opisyal, ang kasunduan ay isang mahalagang hakbang upang mailapit ang serbisyo ng akademya sa mga mamamayan at mas mapaigting pa ang ugnayan ng edukasyon at lokal na pamahalaan sa pagsusulong ng tunay na kaunlaran sa komunidad.

Ipinahayag naman ng pamunuan ng Barangay Kanluran Kabubuhayan ang kanilang taos-pusong pasasalamat at suporta sa nasabing programa, na inaasahang magbubukas ng mas maraming oportunidad para sa mga residente, lalo na sa kabataan.

Ang Community Extension Services Program ay isa sa mga konkretong patunay ng makabuluhang pakikipagtulungan ng sektor ng edukasyon at lokal na pamahalaan para sa inklusibo at progresibong pagbabago sa kanayunan.